बैंक ह्याकिङसँगै नाइजेरियन ‘काले’को ठगी धन्दा– फेसबूकमा आउँथ्यो ‘करोडौं जितेको’ म्यासेज

काठमाडौं करिब २ हप्ता अगाडि महानगरीय अपराध मशाखामा एक महिला ‘अनलाईन’बाट ठगिएको भन्दै गुनासो गर्न आइन् । मलाई अनलाईनमा करोडौंको चिठ्ठा पर्‍यो भनेर पैसा जम्मा गर्न लगाए । उनीहरुले भनेको बैंक खातामा पैसा जम्मा पनि गरे । तर, उनीहरुले मैले जितेको पैंसा दिएनन्,’ अपराध महाशाखामा पुगेकी ती महिलाले आफ्नो गुनासो सुनाइन् ।

करौडौं रुपैयाँको चिठ्ठा परेको भनेपछि आफूले एकजना व्यक्तिको बैंक खातामा ७ लाख ४० हजार रुपैयाँ जम्मा गरेको पनि ती महिलाको भनाइ थियो । प्रहरीले पैसा जम्मा गरेको भौचर माग्यो । उनले भौचर प्रहरीलाई दिइन् । भौचरमा खातावालको नाम थियो, रमेश खड्का । उमेरले ५२ वर्ष पुगिसकेका खड्काले देखिने पेसाका रुपमा काठमाडौंको ठमेलमा एउटा होटेल सञ्चालन गर्छन् । तर, उनको भित्री धन्दा अर्कै रहेछ ।

अपराध महाशाखाको टोलीले महिलाबाट उजुरी लिएकै साँझ खड्कालाई ठमेलबाटै पक्राउ गर्‍यो । प्रहरीलाई दिएको प्रारम्भिक बयानमा खड्काले आफ्नो ‘अनलाईन विजनेश’मा अन्य २ जना पनि ‘सहयोगी’ रहेको बताए । खड्काले भनेका ती सहयोगी थिए– नवलपरासीको रामग्राम नगरपालिका–१७ का ३७ वर्षीया विशेश्वर प्रसाद तिवारी र १९ वर्षीय संदीप कलवार । खड्कालाई पक्राउ गरेको ३ दिनपछि तिवारी र कलवार पनि पक्राउ गरे ।

त्यसपछि तीनैजनाविरुद्ध जिल्ला प्रशासन कार्यालय काठमाडौंमार्फत ‘केही सार्वजनिक अपराध’को मुद्दामा म्याद थप गरेर अनुसन्धान शुरु गरियो । करिब १२ दिनको अनुसन्धानपछि अपराध महाशाखाले पक्राउ परेका ३ जनालाई बुधबार सार्वजनिक गरेको छ । बुधबार सार्वजनिक गरिएका ३ जनाले आफूहरु ‘विदेशी’का लागि काम गर्ने गरेको बताएका छन् ।

प्रहरीका अनुसार पक्राउ परेका ३ जनाले नेपालका १६ बैंकको खाता प्रयोग गरी १४ करोड ६७ लाख ९१ हजार रुपैयाँको कारोबार गरेका छन् । यो रकम उनीहरुले १६ वटा बैंकको खाताबाट विदेश पठाएका देखिएको अपराध महाशाखाका प्रमुख प्रहरी वरिष्ठ उपरीक्षक (एसएसपी) शहकुल थापाले जानकारी दिए । थापाका अनुसार उनीहरुको पहिलो धन्दा थियो– फेसबूक, भाइबर, ईमो, ह्वाट्सएप लगायत सोसल मिडिया र अनलाईनको प्रयोग गरी नेपाली नागरिकलाई प्रलोभनमा पार्ने ।

यसरी प्रलोभनमा पारिसकेपछि उनीहरुले ‘तपाईंको नाममा चिठ्ठा आएको छ, यति रकम (रकम तोकेरै) दिएपछि त्यो चिठ्ठा तपाईंले पाउनुहुन्छ’ भन्दै म्यासेज पठाउँदै । उनीहरुले म्यासेजमै बैंक खाता समेत दिएर पैसा जम्मा गर्न लगाउँथे । पहिले नेपाली ‘एजेन्ट’हरुले नै नेपालीलाई सम्पर्क गरेर चिठ्ठा परेको ‘जानकारी’ दिन्थे ।

त्यसपछि, ‘हाम्रो अफिस बेलायत’मा पनि छ भन्दै विदेशीलाई कुरा गर्न लगाउँथे । विदेशीले नै कुरा गरिसकेपछि पीडित नेपालीहरु छिटो ‘कन्भिन्स’ हुनेगरेको अनुभव पनि उनीहरुले बयानका क्रममा प्रहरीलाई सुनाएका छन् । पीडित नेपालीसँग कुरा गर्ने विदेशी हुन्थे, बेलायती नागरिक स्मिथ मोरिस र नाइजेरियन नागरिक पिटर हर्मन असेंगा ।

कतिपय नेपालीसँग भारतीय नागरिकहरुले ‘हिन्दी’ र नेपालीमा पनि कुरा गर्थे । अपराध महाशाखाले यस्तो ठगीमा संलग्न १० जना भारतीय भएको यकीन गरेपनि उनीहरुको पहिचान भने गर्न सकेको छैन ।

Loading...
प्रकाशित मिति २५ मंसिर २०७६, बुधबार १४:१२